Riektačállinrávvagat –girjjáš lea dál deaddiluvvon

Dán girjjáža lea Norgga Sámediggi buvttadan, ja das leat árvalusat ja njuolggadusat davvisámegiela čállimii. Dan girjji lea Giellagáldu davvisámi giellajuogus dohkkehan cuoŋománu 13.b. 2016.

Riektačállinrávvagat-girjjážis leat dábáleamos čállinrávvagat mielde, earret eará gaskamearkkaid geavaheapmi, movt rihkku, čuokkis ja eará čállinmearkkat galget adnot.

Girji almmuhuvvui vuosttažettiin interneahtas, muhto lea dál maid deaddiluvvon.

Sihke Norgga Sámediggi ja Giellagáldu sávvet ahte dat boahtá buot davvisámegiela geavaheddjiide ávkin!

 

http://samediggi.no/nordsamisk/Giella/Faktadiedut-sami-gielaid-birra/Riektacallinravvagat-dohkkehuvvon

Riektačállinrávvagat.pdf

 

Posted in Giellaođđasat, Ovdasiidu

Dálvejorggáldat

Dan jagi juovlamánu 21. beaivi lea dálvejorggáldat. Dalle lea jagi oaneheamos beaivi ja guhkimus idja, sáhttá lohkat leat beaivvehis beaivi. Dálvejorggáldaga gohččodit maid dálvejagijorggáldahkan dahje áigejorggáldahkan. Dálvejorggáldat lea juogo juovlamánu 21. dahje 22. beaivvi, dat rievddada jagis jahkái.

Beaivvit guhkkugohtet go beaivváš lea fas jorggihan, beaivi guhkku juohke beaivvi ovttain rievssatlávkkiin. Dan beaivvi sáhttá guovlladit boahttevaš dálkkiide, namalassii otná beaivvi dálki govve dálvvi dálkkiid: “Makkár dálki dálvejorggáldahkan, nu áigu leat eanaš dán dálvvis”.

 

Eananspábba davvi spábbabeali beavvejorggáldaga áigge go davvipola lea eret guovlluid beaivváža ektui:

earth-lighting-winter-solstice_en

Gáldut:

Eira Murud: Jahki Sámis

Deanu Giellagátti kaleandar 2015

https://fi.wikipedia.org

 

Govva:

Wikimedia Commons, the free media repository

Posted in Giellablogga, Uncategorized

Skábma

Juovlamánnu lea Sámis seavdnjámuš áigi, go skábma lea álgán iige dat noga ovdal go easka ođđajagimánu bealde. Skábman beaivváš ii loktan almmiravdda bajábeallái ollenge ja ijat ja beaivvit leat seamma seavdnjadat. Diehttelas olu lea gitta das makkár dálkkit deivet leat, leago jalahas vai obbadálki, leago juovlamánus muohta vai čáhppes eanan ja leago sadji mas geahččá badjin vai vuollin. Muohta, násttit ja mánnu čuvget bures go fastten muorat suoivvanastet ja unnidit čuovgga meari.

Govva: Bigga-Helena Magga

Govva: Bigga-Helena Magga

Bihkkaseavdnjat lea dábálaččat dušše čakčat obbadálkin. Seavdnjat lea go ii oainne jur maidege ja geamádat dalle go ii leat girkkis iige vel seavdnjatge, lean unnán čuovga. Veaigin gohččodit áiggi mii lea ija ja beaivvi gaskkas ja albma skápma áiggi gal oačču lohkat ahte idja ja beaivi leaba šaddan ovtta guhkes veaigin.

 

Láđasmánu áigge ihkku sáhttá leat girkásut go beaivet. Gárddástallamat stellejedje dolin láđasmánu áigodahkii vai bargoáigi lei veahá guhkkit. Olbmot lávejedje muitalit máidnasiid eahketbottaid. Mánáid lávejedje baldalit gopmemáidnasiin ja čeahpimus máinnasteaddji lei dat geasa alccet dahje su olbmái ledje dáhpáhuvvan buot fearánat.

 

Dan áigge olbmot eai dárbbat sirdit bargguideaset seavdnjada dihte go juohke sadjái lea vejolaš oažžut čuovgga. Bigálusgárddiin huraidit aggregáhtat, mat buvttadit čuovgga ja biillain ja gielkkáin leat buorit vuodjinčuovggat. Olbmot geavahit gállolámppáid iige giige coggal šat lubmalámppá njálbmái barggadettiin nugo vel muhtin áigge das maŋŋelii dahke.

 

Gáldut:

http://www.rktl.fi/www/uploads/pdf/raportti245.pdf

http://www.giella.org/?lang=smn

 

Govva:

Bigga-Helena Magga

Artihkalgovva: Vilho-Simon Mäkinen

Posted in Giellablogga, Uncategorized

Supermánnu

Skábmamánu nuppi mánnodaga oidno almmiravddas ng. Supermánnu. Mánnu lea dalle iežas johtingeainnus lagamusas eatnama, 356 400 kilomehtera geahčen. Go mánnu lea guhkimusas eatnamis, dat lea sullii 406 700 kilomehtera geahčen. Sivvan dasa ahte mánu ja eatnama gaska molsašuddá lea mánu johtingeainnu elliptalaš hápmi.

supermoon_comparisonSupermánu áigge mánnu lea measta goalmmátoasi girkásut ja sullii 14 % stuorát go dábálaččat. Ovddit geardi, go mánnu lea orron seammá stuoris, lei jagis 1948 ja čuovvovaš geardde dat lea jagi 2034 skábmamánus. Supermánnu -tearpma lea hutkan astrologa Richard Nolle 1970-logus.

Supermánnu šaddá go Eanan, Mánnu ja Beaivváš leat seammá linjjás ja Mánnu lea iežas johtingeainnus lagamusat Eatnama. Dalle Mánnu orru leame erenomáš stuoris Eatnamis geahčadettiin. Almmiravddas Mánnu orru leame stuorát go maid dat lea almmis. Dalle olbmo áiccut fillejit olbmo govahallat mánu stuorábun go maid dat duođalaččat lea.

Govva: Vilho-Simon Mäkinen

Govva: Vilho-Simon Mäkinen

Supermánnu ii leat nu beare hárvenaš, dat oidno juohke 14 mánu. Dan jagi skábmamánus dat lea fal erenomáš stuoris. Juo Supermánu geahččá teleskohpain, gánneha geavahit vaikko beaivvášlásaid devkkodeaddjin. Váidalahtti dálkedieđáhus lea einnostan obbadálkki olles mánnodahkii.

 

Gádut:

https://www.ursa.fi/blogi/otsikon-takana/kuka-kumman-superkuu

http://www.avaruus.fi/index.php?id=8611

http://yle.fi/aihe/artikkeli/2016/11/13/katse-taivaalle-suurin-ja-kirkkain-superkuu-68-vuoteen

Govat:

Vilho-Simon Mäkinen

https://commons.wikimedia.org/wiki/File:Supermoon_comparison.jpg

https://pixabay.com/fi/moon-y%C3%B6-t%C3%A4ysikuu-kirkkaus-astro-1535927/

 

Posted in Giellablogga, Ovdasiidu

Mii vielpái namman?

Go vielppis stuorru, dárbbaša dat nama vai dan sáhttá čuorvut nama mielde. Lohket ahte namma ferte leat dalle go vielpá galgá gohččugoahtit. Nama sáhttá addit vaikkoba guolgga dahje ivnni mielde dahje juos das leat erenomáš mearkkat. Luonddunai sáhttá čuovvut ja dan mielde nammadit beatnaga. Leago vielppis ciiku vai rávjá, váikkuha maid nammii. Juohke dáfus beana galgá oažžut buori nama, dakkára mii heive dan lundui dahje muđui lea dasa vuogas.

Juos beana lea unni, dat sáhtálii leat Benne, muhto dalle dat galgá leat rávjá. Juos beana lea unni ja buoidi, dasa heive namma Jarfe. Juos beana lea čáhppat iige beare stuoris, dat livččii Hulmmo. Čalmmon gohččodit beatnaga mas leat dielkkut goappašat čalmmi bajábealde ja Čierggis lea beana man čeabeha birra lea vilges gierdu.

Ciiku mii lea ciellalas ja man jietna guoddá guhkás, lea Šaike Višši ja buorre boazobeana lea Siekkis go fas beana mii lea háippas ja čuorbi, liiggolii leat Háipa. Virkkos, ilolaš beana heive leat Virggo ja beana mii ciellá ja bávká dohkke leat Bávkko.

Namat sáhttet rievdadit guovllus guvlui ja daid daddjo veahá eará ládje, ovdamearkan vaikko Dielku ja Dilko. Guolgaivnni dáfus beatnagat leat seammaláganat, namma lea fal earálágan sierra guovlluin. Muhtin sajiin juoga namma sáhttá leat dušše ciikobeatnagii, nuppi guovllus dat namma leage rávjábeatnaga namma.

 

Muhto ovdalgo olmmoš diehtá mii vielpái namman, son gohččoda dan cugun.

Bolfi Govva: Bigga-Helena Magga

Bolfi
Govva: Bigga-Helena Magga

 

 

Sámi Giellalávdegoddi lea dohkkehan muhtin beatnatnamaid. Dat gávdnojit dákko Beatnatnamat

Eambbo dieđuid beatnagiid namain gávdno maid Konrad Nielsena samisk ordbok- girjjis ja Káre Elle Gaupa Girjjo-Gárjjo- girjjis.

 

Gáldut:

Gaup Karen Elle, Girjjo-Gárjjo – Muitalusat, máidnasat, sátnevádjasat, árvádusat ja diiddat. 2001.

Sámi Giellagáldu: http://www.giella.org/?page_id=15

Posted in Giellablogga, Ovdasiidu